A Televisión de Galicia alterou este mércores a súa grella para ofrecer unha cobertura especial do accidente ferroviario rexistrado en Urda, na provincia de Toledo. A canle pública reforzou a súa programación informativa durante toda a xornada e manterá especiais informativos tanto pola tarde como pola noite.
A traxedia ferroviaria ocorrida a primeira hora da mañá obrigou á TVG a reorganizar a súa programación habitual para priorizar a información relacionada co sinistro e a evolución da situación.
Tras ampliar a duración do Bos días ata as 11:15 horas, a canle deu paso a un Especial Informativo presentado por María Cheda, que ocupou boa parte da programación matinal. O espazo só se interrompeu brevemente para a emisión dun Galicia Noticias reducido e, ao mediodía, os Servizos Informativos ofreceron tamén un Telexornal monográfico centrado no accidente e no balance provisional da traxedia.
Especiais informativos pola tarde e pola noite
A cobertura continuará durante a tarde coa emisión dun novo Especial Informativo ás 18:05 horas, unha vez remate En compañía de Loli.
Xa na noite, o Telexornal das 21:00 horas retomará a información sobre o accidente, incorporando as últimas actualizacións e os datos confirmados polas fontes oficiais ao longo da xornada.
A programación especial completarase cun novo espazo informativo previsto para despois de Land Rober, co que a TVG pechará unha xornada marcada pola atención permanente ao desenvolvemento da traxedia.
A Radio Galega tamén reforza a cobertura
Paralelamente, a Radio Galega dedica a súa programación informativa ao seguimento do accidente ferroviario e está a ofrecer de maneira continua os datos que van sendo confirmados polas autoridades e os servizos de emerxencia.
Tanto a televisión como a radio públicas galegas centran así a súa cobertura nun dos acontecementos informativos máis relevantes da xornada.
